Vazirlikning rasmiy xabarida aytilishicha, ushbu ma’lumotlar haqiqatga to‘g‘ri kelmaydi.

Prezident qaroriga ko‘ra, bino va unga tutash inshootlar operativ boshqaruv huquqi asosida O‘zA Milliy axborot agentligiga berilgan. Obyekt negizida media shaharcha tashkil etish rejalashtirilgan.

Ma’lum qilinishicha, hozirda binoda demontaj ishlari yakunlanib, qurilish-montaj ishlarini boshlash uchun loyiha-smeta hujjatlari tayyorlangan. Bino va inshootlarni sotish ko‘zda tutilmagan — O‘zA obyektning yagona balansda saqlovchisi bo‘lib qoladi.

Rekonstruksiya ishlari yakunlangach, binoda mamlakatdagi barcha davriy bosma nashrlar tahririyatlari joylashadi.

Eslatib o‘tamiz, "Matbuot uyi" 2018-yil bahorida kimoshdi savdosiga qo‘yilgan edi. O‘shanda obyektning boshlang‘ich narxi 18,7 mlrd so‘m bo‘lgan. Biroq, keyinchalik lot savdolardan olib tashlandi.

2024-yil boshida binoning quyoshdan himoyalovchi konstruksiyalar kabi noyob me’moriy elementlarining olib tashlanishi sababli jamoatchilikni tashvishga solgan demontaj ishlari boshlandi. Mutaxassislarning ta’kidlashicha, bu elementlar binoga nafaqat o‘ziga xos ko‘rinish bergan, balki muhim energiya tejamkor funksiyani ham bajargan.

Toshkentdagi "Matbuot uyi" yoki "Gazeta korpusi" 1975-yilda qurilgan bo‘lib, uzoq vaqt davomida ko‘plab respublika gazeta va jurnallari tahririyatlari joylashgan. Arxitektor Rixard Blaze tomonidan loyihalashtirilgan bino sovet modernizmining namunasi edi.