Hujjatga ko‘ra, tashkilotchilar reklamada chiqish formatini: "Jonli ijro", "Fonogrammadan foydalangan holda jonli ovoz" yoki "Fonogrammali konsert dasturi" shaklida aniq ko‘rsatishlari shart.
Madaniyat vazirligi san’atkorlarni davlat mukofotlariga tavsiya etishda, birinchi navbatda, ularning jonli ijro qobiliyatini inobatga oladi. Bu "O‘zbekiston Respublikasi xalq artisti", "O‘zbekiston Respublikasida xizmat ko‘rsatgan artist", "O‘zbekiston Respublikasi xalq hofizi" unvonlarini berishga taalluqlidir.
2025-yil 1-iyuldan boshlab qo‘shimcha chora-tadbirlar kuchga kiradi. Jonli ijrodagi konsertlar tashkilotchilariga Milliy teleradiokompaniya telekanallarida reklamalarni efirga uzatish uchun 30 foiz chegirma beriladi. Jonli ijro etilgan yoki fonogrammadan qisman foydalanilgan tadbirlar badiiy kengashning ijobiy xulosasi mavjud bo‘lgan taqdirda davlat telekanallari orqali bepul efirga uzatiladi.
Shuningdek, joriy yilning iyul oyidan boshlab har uch oyda mamlakatimizning barcha hududlarida "Jonli ijro" haftaligi o‘tkaziladi.
Yangi chora-tadbirlar konsert dasturlari sifatini oshirish va fonogrammadan foydalanmasdan konsert beradigan san’atkorlarni qo‘llab-quvvatlashga qaratilgan.