Birinchi tan olingan obyekt Mug‘ tog‘idan topilgan sug‘d hujjatlari bo‘ldi. VIII asrning noyob yozma manbalari maktublar, bitimlar, diplomatik yozishmalar va hatto josuslik xabarlaridir. Ularda mintaqaning arablar tomonidan bosib olinishi arafasida sodir bo‘lgan voqealar yoritilgan bo‘lib, Sug‘dning o‘sha davrdagi siyosiy, ijtimoiy va madaniy hayotidan muhim guvohlik beradi.

Ikkinchi obyekt — Qozog‘istondagi "Xonlar shajarasi" qo‘lyozmasi. XVIII asrda chig‘atoy tilida yaratilgan bu asarda Odam Ato va Muhammad (s.a.v) dan boshlab turk-mo‘g‘ul, fors va arab dunyosi hukmdorlarining shajarasi batafsil bayon etilgan. Qo‘lyozma yuksak tarixiy qimmatga ega bo‘lib, Markaziy Osiyodagi sulolaviy aloqalar va hokimiyat haqidagi tasavvurlarni o‘rganishda muhim manba hisoblanadi.

Ikkala hujjat ham IICAS va Hujjatli meros xalqaro markazi (ICDH) hamkorligi tufayli YUNESKO xalqaro reyestriga kiritilgan.