Bu yilgi ochilish marosimida jahon kinematografiyasiga qo‘shgan hissasi uchun Robert De Niroga faxriy "Oltin palma novdasi" topshirildi.

Mukofotni aktyorga "Gulli oy qotillari" (2023) filmidagi sherigi Leonardo Di Kaprio topshirdi. Marosim boshlanishidan oldin tadbir mehmonlari De Nironing eng mashhur rollaridan biri — rejissyor Martin Skorsezening "Taksi haydovchisi" (1976) filmidagi bosh qahramon obrazini yodga olishdi.

De Niro aktyorlik faoliyatini 1960-yillarda boshlagan. Bugungi kunga qadar u to‘liq metrajli filmlarda 110 dan ortiq rollarni ijro etgan, ularning aksariyati klassikaga aylangan.

Har yilgidek, tashkilotchilar ikkita "Oltin palma novdasi"ni tayyorlashdi: biri kino san’atiga qo‘shgan hissasi uchun, ikkinchisi asosiy tanlov g‘olibiga beriladi. 2025-yilda 19 ta film, jumladan, uchta fransuz filmi festivalning bosh sovrini uchun kurashadi.