Qozog‘iston trilleri “Auru” milliy kinoda tarixida o’chmas iz qoldirmoqda: film Gorillaz guruhining afsonaviy “Feel Good Inc.” trekidan rasmiy saundtrek sifatida foydalanish huquqini qo’lga kiritdi. Markaziy Osiyoda birinchi marta jahon darajadagi hit-kompozitsiya saundtrek sifatida litsenziyalandi.

Bu nima uchun muhim?

"Feel Good Inc." - XXI asrning eng mashhur qo’shiqlaridan biri bo’lib, qo'shiq Grammy mukofotini qo'lga kiritgan, bundan tashqari 2005-yildan beri jahon chartlarida yuqori o’rinlarni egallab kelmoqda. YouTube platformasida esa 1,2 milliarddan ortiq marotaba tomosha qilingan. Filmda ushbu kompozitsiya shunchaki musiqiy element emas, balki qahramonlar duch keladigan illuziyalar va soxta rahm-shafqatning ramzi bo’lib xizmat qiladi.

Film haqida qisqacha

"Auru" - provokativ triller va noir uslubidagi psixologik drama. Rejissyor — «Sheker» veb-seriyasi va boshqa loyihalari bilan tanilgan Aytore Joldaskali. Bosh rollarni Ayan Otepbergen va Dilnaz Qurmangaliyeva ijro etadi. Film Kann kinofestivalining professional platformasi bo'lgan Marché du Filmda taqdim etildi.

Premyera qachonga rejalashtirilgan?

Filmning jahon premyerasi 2025-yil 13-noyabrda bo‘lib o‘tadi. Bundan tashqari, film bir qator xalqaro kinofestivallarda ham namoyish etiladi.