O‘zbek filmlari Sankt-Peterburgdagi Lendoc xalqoro kinofestivalida ishtirok etadi

22-24 avgust kunlari Sankt-Peterburgda Rossiya va MDH mamlakatlari kino ijodkorlari ishtirokida VI Xalqaro Lendoc kinofestivali (LEFF) bo‘lib o‘tadi.

Tanlov dasturiga sakkiz davlatning 30 dan ortiq filmlari kiritilgan. Kinofestivalga Qozog‘iston, Qirg‘iziston, Tojikiston, O‘zbekiston, Turkmaniston, Belarus, shuningdek, Hindiston va Xitoy (bu yil birinchi marta) rejissyorlari, prodyuserlari, aktyorlari va madaniyat arboblari taklif etilgan. Asosiy tanlovda chet el ijodkorlari bilan bir qatorda o‘zbek rejissyorlarining ijod namunalari ham taqdim etiladi.

Dasturni Farhat Sharipovning “Evakuatsiya” (“Evacuation”) jangovar dramasi ochib beradi. Festival Rossiya Madaniyat vazirligi va Sankt-Peterburg madaniyat qo‘mitasi homiyligida "Lendoc” kinostudiyasi va “Kinomadaniyat” (АНО «Кинокультура») tomonidan tashkil etilgan.

Festival haqida qisqacha

• Lendoc kinofestivali (LEFF) Sankt-Peterburg shahrida 2020-yildan buyon “Lendoc” kinostudiyasida o‘tkazib kelinmoqda;
• Festival Rossiya, MDH mamlakatlari va qo'shni Osiyo mamlakatlarning madaniy va etnik xilma-xilligini targ'ib qilishga qaratilgan.
• LEFF dasturi badiiy va hujjatli filmlardan iborat.