Ushbu tadbir tarixiy ahamiyatga ega: 40 yildan ortiq vaqt davomida forum birinchi marta Parijda emas, balki boshqa mamlakatda, Markaziy Osiyoda esa birinchi marta o‘tkazilmoqda.
Ikki hafta davomida, 30 oktyabrdan 13 noyabrgacha Samarqand tashkilotga a’zo 193 davlatdan minglab delegatlar: vazirlar, diplomatlar, ekspertlar va xalqaro institutlar vakillarini qabul qiladi.
Konferensiyaning asosiy maqsadi YUNESKOning kelgusi yillardagi faoliyatining strategik yo‘nalishlarini belgilab olishdan iborat: madaniy merosni himoya qilishdan fan va innovatsiyalarni rivojlantirishgacha; raqamli adolatni targ‘ib qilishdan barqaror rivojlanishni qo‘llab-quvvatlashgacha.
Ishtirokchilar bir qator muhim rezolyutsiyalarni, xususan, "Tinchlik xotirasi" dasturini kengaytirish, beqarorlik zonalarida madaniy boyliklarni himoya qilish, ta’lim va fan sohasidagi xalqaro hamkorlikni mustahkamlash masalalari bo‘yicha qabul qilishi kutilmoqda.
Samarqandning tanlanishi bejiz emas. YUNESKOning Butunjahon merosi ro‘yxatiga "Madaniyatlar chorrahasi" sifatida kiritilgan ushbu qadimiy shahar sivilizatsiyalar muloqoti va madaniy an’analar o‘zaro bog‘liqligining ramzidir.
Sessiya ochilishi arafasida, 27-28 oktyabr kunlari Samarqandda YUNESKOning XIV Yoshlar forumi bo‘lib o‘tdi. Unda 140 mamlakatdan 150 nafardan ortiq yoshlar yetakchilari "Iqlimga oid harakatlar va ijtimoiy ta’sirlar, ayniqsa yoshlar uchun" mavzusida o‘z tashabbus va g‘oyalarini taqdim etdi.
Forum yakunida konferensiyaning yalpi majlislarida taqdim etiladigan "Call to Action" ("Harakatga chaqiriq") hujjati qabul qilindi. Tarixda birinchi marta yoshlar ovozi Bosh konferensiyaning rasmiy kun tartibiga to‘g‘ridan-to‘g‘ri kiritiladi.
Tadbirga Samarqand bir necha yil tayyorgarlik ko‘rgan. Shahar sezilarli darajada o‘zgardi: ko‘chalar yangilandi, transport bog‘lamalari rekonstruksiya qilindi, infratuzilma kuchaytirildi. Forum arafasida bu yerda maktab o‘quvchilari uchun ta’lim dasturlari o‘tkaziladigan ekologiya va madaniy merosga bag‘ishlangan YUNESKO bog‘i ochildi.