Tadbir O‘zbekiston va xorijiy mamlakatlar kino sanoatining yetakchi vakillari, kinoshunoslari va yosh mualliflarini birlashtirgan “Tirik tarix” xalqaro kinoforumining yakuniga aylandi.

Bu yil “Eng yaxshi hujjatli film” nominatsiyasida rejissyor Jahongir Ahmedovning “Ezgu Film” studiyasi tomonidan suratga olingan “Oq oltin balosi” kartinasi g‘olib bo‘ldi. Film hakamlar hay’ati tomonidan ijtimoiy teranligi va chuqur mualliflik nuqtayi nazari uchun yuqori baholandi.

“Eng yaxshi film” nominatsiyasida mukofotning bosh sovrini O‘zbekiston milliy kinematografiyani rivojlantirish markazi tomonidan yaratilgan Muzaffarxon Erkinov rejissyorligidagi “Maxtumquli Firog‘iy” badiiy filmiga berildi.

Zulfiqor Musoqovning “Umida. Fudziyama haqida tush” filmi eng yaxshi rejissyorlik ishi deb topildi.

Rejissor Iqbol Meliqo‘ziyevning “Amaliyotchi qiz” (Imkon Films) filmi tomoshabinlar olqishiga sazovor bo‘ldi.

O‘zbekiston animatsiya studiyalari assotsiatsiyasi ko‘magida yaratilgan rejissyor Azizbek Muhammedovning “Aqlli qizaloq” ishi eng yaxshi animatsion film nomiga erishdi.

Eng yaxshi montajchi deb Azim Botirov (“Daydi shamol”) ko‘rsatildi. Grim yo‘nalishida Mahbubat Esonova g‘olib bo‘lgan bo‘lsa, liboslar bo‘yicha eng yaxshi rassom Nigora Po‘latova “Maxtumquli Firog‘iy” filmi uchun mukofotni qo‘lga kiritdi.

Eng yaxshi postanovkachi rassom Bektosh Rajabov (“Paxta”) bo‘ldi, eng yaxshi kinokompozitor sifatida esa Jamshid Izamov “Mening mahallam” filmi uchun eʼtirof etildi.

Boris Litovchenkoning “Paxta” filmidagi operatorlik ishi va Erkin A’zamning (“Bahorni quvib”) ssenariysi eng yaxshi degan nomga loyiq bo‘ldi.

Aktyorlik yo‘nalishida Ulug‘bek Muhammadkarimov “Eng yaxshi erkak roli” (“Choliq”), Yulduz Rajabova “Eng yaxshi ayol roli” (“Shamsqamar”) nominatsiyalarida yetakchilik qilishdi.

O‘zbek kinematografiyasi rivojiga qo‘shgan hissasi uchun “Oltin Humo” maxsus mukofotining tantanali ravishda topshirilishi tadbirga alohida kayfiyat bag‘ishladi. Uning sovrindorlari O‘zbekiston xalq artisti Gulchehra Jamilova, san’atshunoslik fanlari nomzodi, professor Sabohat Hayitmatova, taniqli grim ustasi Baxtiyor Temirov va kinokompozitor Mirxalil Mahmudov bo‘ldi.

Tashkilotchilar “Tirik tarix” mukofoti va forumi avlodlar muloqoti, milliy kinoni targ‘ib qilish va o‘zbek kinematografiyasini xalqaro madaniy makonga integratsiya qilish uchun muhim platforma bo‘lib xizmat qilishini ta’kidladilar.