Har bir xonadonda «Bolalar» yangragan, to‘ylarda Yulduz Usmonova qo‘shiq kuylagan, sevishganlar esa «Setora» qo‘shiqlari yozilgan kassetalarni bir-biriga sovg‘a qilishgan.

Yoshlar bu qo‘shiqlarni yoddan bilgan, ularni tinglaganda yig‘lagan va xursand bo‘lgan, tongacha raqsga tushgan va birinchi bor sevib qolgan. Bugun ular yangraganda — butun bir avlodni vaqt mashinasi kabi yoshligiga qaytaradi.

Yulduz Usmonova — Olma-olma

Yulduz maktabdayoq qo‘shiq kuylashni boshlagan, ammo uning haqiqiy parvozi 1980-yillarga to‘g‘ri kelgan. Tadbirlardan birida uning iste’dodini Tamaraxonimning singlisi ko‘rib qolib, Marg‘ilondan Toshkentga o‘qishga olib kelgan. O‘shanda xonandaning omadi kulib boqdi: O‘zbekistonda milliy estrada faol rivojlangan bir paytda Yulduzning «Mayda» nomli albomi chiqdi. 1990-yildayoq u «Osiyo ovozi» xalqaro tanlovining finaliga chiqdi va tez orada qo‘shiqlari butun sobiq Ittifoq bo‘ylab yangradi.

Usmonovaning musiqasi an’anaviy o‘zbek ohanglarini zamonaviy ritmlar — pop, folk, ba’zan rok va sharqona etnik elementlar bilan bog‘laydi. Uning ovozi kuchli, shuning uchun u hali ham boshqa ijrochilar orasida sal xirillagan tovushi bilan ajralib turadi. Usmonova endilikda o‘zbek sahnasining tirik afsonasidir. Uning ta’siri yosh san’atkorlar ijodida sezilib turadi. Hatto 30 yil oldin yozilgan qo‘shiqlar ham hali hanuz har qanday avlodning pleylistidan joy olishi mumkin.

Jonim — O’tib etadi

«Jonim» guruhi esingizdami? Guruh uzoq yashamagan bo‘lsa-da (1999-yildan 2001-yilgacha), u 90-yillar yakunining yorqin namoyandasi bo‘lgan. O‘shanda guruhning qo‘shiqlari hamma joyda yangrardi – «O‘tib ketadi» va «Qarama ko‘zlarimga» taronalarini ko‘pchilik yoddan bilishardi.

Guruh tarkibiga Aziza Nasriddinova va Zilola Musayeva (yakkaxon faoliyatini ikki minginchi yillarda boshlagan Shahzoda) kirgan. Oradan bir-ikki oy o‘tib, ularning «O‘tib ketadi» singli xitga aylandi va «Tohir va Zuhra» filmida yangradi.

Aziza ketganidan so‘ng uning o‘rnini bastakor va guruh asoschisi Vagif Zokirovning rafiqasi Natella egalladi va «Jonim»ning yangilangan tarkibida «Tarona 2001» mukofotiga sazovor bo‘ldi. Ammo ko‘p o‘tmay ishtirokchilarning yo‘llari ayrildi va guruh butun bir davrning go‘zal xotirasiga aylandi.

Bolalar — Esingdami seni?

Ular birinchi bo‘lib o‘zbek pop-musiqasini sahna timsollari, raqslar va g‘arb ohangi bilan haqiqiy modaga aylantirgan. «Bolalar» 1989-yilda Toshkentda Tohir Sodiqov va uning do‘stlari — Ruslan Sharipov hamda 41-maktabdagi sinfdoshlari — Bahodir Po‘latov va Javohir Zokirovlar tomonidan tashkil etilgan. Bir yil o‘tgach, jamoa «Esingdami seni» debyut albomini ommaga taqdim etdi va bu ularga mislsiz mashhurlik keltirdi, keyin esa guruh tarixi shakllandi.

Ko‘pchilik ularni an’anaviy boysbend (tashqi ko‘rinishi kelishgan yigitlardan iborat vokal va raqs pop-guruhi)ning sharqona jozibaga ega o‘zbekcha muqobili deb atagan edi. Vaqt o‘tishi bilan tarkib o‘zgardi va ishtirokchilar, odatdagidek, yakkaxon loyihalarni boshladilar. Ammo oradan o‘nlab yillar o‘tgan bo‘lsa-da, «Bolalar» qo‘shiqlari tinglovchilarda sog‘inch hissi va tabassum uyg‘otadi.

Al-Vakil — Bom-bosh ko’chalar

Afsuski, bugungi kunda ushbu guruh xonanda Laylo Aliyevaning dahshatli qotilligi orqali tanilgan.

Biroq o‘z vaqtida «Al-Vakil» guruhini haqli ravishda o‘zbek sahnasining kashshoflari deb atash mumkin edi, chunki aynan ular mamlakatga rep yo‘nalishini olib kirgan. «Bo‘m-bo‘sh ko‘chalar», «Ajoyib Kun», «Dam-dam» kabi qo‘shiqlar xit bo‘lgan. Ushbu mashhurlikka 1998-yilda chek qo‘yildi.

Setora — Ohim

1998-yil 1-mart kuni uch nafar sinfdoshlar — Kamila Xo‘jayeva, Laylo Galiyeva va Feruza Latipova «Sevgi qaydasan» nomli qo‘shig‘i bilan butun mamlakatni zabt etdi. «Setora» guruhining nomi «uch tor» va «yulduz» degan ma’noni anglatadi. Asr boshida boshqalarga qaraganda yorqinroq yangragan va esda qolgan qizlar uchun bu nom ramziy ma’noga ega bo‘ldi.

Debyut albomi chiqqanidan so‘ng, ular gastrol safarlariga chiqdi, zallarni tomoshabinlar bilan to‘ldirdi hamda «Yonma», «Ohim» va «Yo‘q demagin» xitlarini ommaga taqdim etdi. Ularni O‘zbekistonning barcha burchaklarida bilishar va sevishar edi.

2005-yilda guruh Tarona Records leybli bilan kelisholmay qoldi va «Setora» nomini yo‘qotdi. So‘ngra qizlar yangi «SeTanho» nomi bilan sahnaga qaytdi va «Number 1» albomini chiqardi.

Keyinchalik ishtirokchilarning yo‘llari ayrildi: Laylo «Leyli» nomi bilan yakkaxon faoliyatini boshladi, Kamila va Feruza esa birgalikda chiqish qilishda davom etdi. Ammo «Setora» nomi o‘zbek pop-musiqasining yorqin, samimiy va nazokatli davrining ramzi sifatida tinglovchilar xotirasida abadiy saqlanib qoldi.

DJ Piligrim — Мне не жить без тебя (Sensiz yashay olmayman)

DJ Piligrim, ya’ni Ilhom Yo‘lchiyev, 90-yillarning oxirida O‘zbekiston musiqa sahnasiga yorqin, dadil, mamlakat uchun yangi ohang bilan kirib keldi.

DJ Piligrim paydo bo‘lgunga qadar muxlislar o‘zbek tilida yaratilgan qo‘shiqlar zamonaviy klublarda va raqs maydonlarida yangrashini tasavvur qila olmas edi. U buni o‘zgartira oldi — sharqona ohanglarni elektron ritm bilan bog‘ladi va o‘zbek pop-musiqasini yangi bosqichga olib chiqdi.

Faoliyatini yerto‘ladagi kichik studiyadan boshlagan Piligrim bir necha yil ichida jahon darajasidagi qo‘shiqlarni yaratdi. Best DJ taxallusi ostida ijod qilgan dijeydan u 90-yillar oxiri-2000-yillar boshidagi zamonaviy o‘zbek estradasining qiyofasini belgilab bergan san’atkorga aylandi.

Dado — Dado-Nado

Ularni tanishtirib o‘tirishning keragi yo‘q. Guruh 90-yillarda, ilgari «Anor» jamoasi ishtirokchilari bo‘lgan aka-uka Alisher va Rustam Madumarovlar o‘z loyihasini yaratishga qaror qilganidayoq estrada olamida iz qoldirishga ulgurgan edi. O‘shanda milliy sahna faqat yangi ohangni izlar, «Dado» esa tomoshabinga aynan kerakli narsani taklif qila oldi, ya’ni xalqaro talabga javob beruvchi va benuqson ohangga ega zamonaviy pop-musiqani («Dado-Nado» bunga yaqqol misol).

Duet o‘z qo‘shiqlarini o‘zbek va rus tillaridan tortib italyan va turk tillarigacha ijro etgan. Bu ularni boshqalardan ajratib turardi, balki shu tufayli ular mamlakatdan tashqarida ham mashhurlikka erishgandir. «Y?» debyut albomi 2000-yilda ularni tezda tanitdi, ikkinchisi «Yoz» (2002) esa postsovet hududida muvaffaqiyatni mustahkamladi. «Yuragim», «Benom», «Yoz» va «Chat-Pat» treklari hamma joyda: radiostansiyalarda, klublarda, hatto Rossiyaning MTV kanallarida ham yangrardi.

Dado xalqaro musiqa maydoniga kira olgan O‘zbekistonning noyob guruhi bo‘lib qoldi. Biroq ko‘p kuzatilganiday, loyiha vaqt sinovidan o‘ta olmadi va 2008-yilga kelib o‘z faoliyatini to‘xtatdi.